ARABIC | ARMENIAN | ENGLISH |
Fri 28 Feb 2014
Վարդանանց տօնակատարութիւն Յովհաննէս Պօղոսեան սրահին մէջ


Վարդանանց տօնակատարութիւն Յովհաննէս Պօղոսեան սրահին մէջ

Պուրճ Համմուտ


Հովանաւորութեամբ՝ Տանն Կիլիկիոյ կաթողիկէ Հայոց ամենապատիւ Տէր Ներսէս Պետրոս ԺԹ. Կաթողիկոս Պատրիարքի, նախագահութեամբ՝ հայ կաթողիկէ պատրիարքական Պէյրութի թեմի ընդհանուր փոխանորդ՝ Զմմառու վանքի մեծաւոր գերապայծառ հայր Գաբրիէլ թ.ծ.վրդ. Մուրատեանի եւ կազմակերպութեամբ՝ հայ կաթողիկէ «Սուրբ Փրկիչ» Եկեղեցւոյ ժողովրդապետութեան, չորեքշաբթի 26 փետրուար 2014-ի երեկոյեան ժամը 8-ին, «Սուրբ Փրկիչ» եկեղեցւոյ Յովհաննէս Պօղոսեան սրահին մէջ տեղի ունեցաւ Վարդանանց տօնահանդէս, որուն ներկայ գտնուեցան նաեւ հայ կաթողիկէ վարժարաններու աշակերտութիւնն ու հոծ բազմութիւն:

Լիբանանեան եւ հայկական քայլերգներէն ետք, օրուան հանդիսավար՝ Սուրբ Մեսրոպի արիներէն՝ Լեւոն Փիլաւճեան ողջունեց ներկաները: Բացման խօսքով ելոյթ ունեցաւ Պր. Եղիկ Պետրոսեան, որ Վարդանանց ոգիով ընթանալու կոչ ըրաւ:

Գեղարուեստական յայտագրի առաջին բաժինը կ'ընդգրկէր՝ խմբային ասմունք «Վարդանատօն» Մեսրոպեան վարժարանի 8-րդ դասարանի մասնակցութեամբ, «Վարդանանց» ասմունքներ՝ կատարողութեամբ Ազնիւ Փոլատեանի եւ «Համադրում Վարդանանցի» Սրբուհի Ագնէս վարժարանի աշակերտներուն կողմէ:

Ապա «Սարդարապատ» եւ «Երեւան» ազգային ու ժողովրդական երգեր, կատարողութեամբ Ֆլիւթ՝ Նարեկ Հեքիմեանի, Քլարինէթ՝Արմիկ Հեքիմեանի, դաշնամուր՝ Համբիկ Յովհաննէսեանի եւ օրկ՝ Յովսէփ Ահմարանեանի: Ապա Մեսրոպեան վարժարանի «Շուշի» պարախումբը ներկայացաւ «Հայ ենք մենք» պարով: Զմմառու Երանելի Իգնատիոս Մալոյեան դպրեվանքի կղերիկոսները ներկայացուցին «Նորահրաշ Պսակաւոր» եւ «Գողթնի Քնարք» տաղերը, ղեկավարութեամբ՝ հայր Մաշտոց վրդ. Զահթէրեանի:   

Օրուան բանախօս՝ «Սուրբ Փրկիչ» եկեղեցւոյ փոխ ժողովրդապետ՝ հայր Ղազար վրդ. Պետրոսեան նախ պատմական ակնարկով մը ներկայացուց Վարդանանցը, ըսելով. «Հայաստանի մէջ Քրիստոնէութիւնը պետական կրօն հռչակուած առաջին իսկ օրէն, հայը փարեցաւ Քրիստոսին եւ իր կեանքի գնով պայքարեցաւ, որ զայն ամուր, անբիծ պահէ:


«Հայը պայքարեցաւ ե՛ւ անհատապէս եւ ազգովին, որու ցայտուն ապացոյցներէն մին՝451-ի Մայիսին, Վարդանանց Ճակատամարտն էր՝ընդդէմ զրադաշտական կրօնը հայուն պարտադրել փորձող Յազկերտին:
«Ճիշտ է որ պատերազմը Մայիսին տեղի ունեցաւ Աւարայրի դաշտին վրայ, Տղմուտ գետի ափին. սակայն մենք զայն կը նշենք Բարեկենդանին նախորդող հինգշաբթին, որպէսզի Վարդանանցի ոգիով տոգորուած պահենք պահոց շրջանը:
«Վարդանանց Ճակատամարտին ազգս զոհեց երկրի ղեկավարութիւնը. անոնք ինկան որպէսզի մենք ապրինք արժանապատուորէն եւ Քրիստոնեավայել կեանք մը: Վարդանանց ոգին 5-րդ դարէն սաւառնելով հասաւ մերօրեայ Արցախեան պայքարին, ուր հայը անգամ մը եւս ապացուցեց որ ի հարկին ինքնանուէր կ'ունենայ մարտունակ ոգի:
«Ինչպէս գիտէք, Վարդանանցի պատգամով եւ օրինակով այսօր եւս մեզի կը ներկայանան նորանոր հերոսներ, նորանոր պատգամներ եւ նորանոր ուխտեալ Վարդաններ»: Ապա ան երեք հիմնական գաղափարներու շուրջ զարգացուց իր բանախօսութիւնը. «Հաւատք Քրիստոսի վրայ, հաւատք ազգային արժանիքներու նկատմամբ եւ հաւատք մեր բիւրաւոր նահատակներու յիշատակին»: Հուսկ հայր Սուրբը ապագայի տեսլականով եզրափակեց խօսքը:

Գեղարուեստական յայտագրի երկրորդ բաժինը ընդգրկեց՝ Բլբուլ մանկապատանեկան եւ Արծիւեան երգչախումբերու ու մենակատարութիւններու ներկայացումը, ղեկավարութեամբ՝ Պր. Մանուէլ Քէշիշեանի:
Ապա ան «Սուրբ Փրկիչ» եկեղեցւոյ ժողովրդապետ՝ հայր Սարգիս վրդ. Դաւիթեան շնորհակալութիւն յայտնեց հանդիսութիւնը յաջողցնողներուն եւ մասնակիցներուն :

Տօնակատարութեան աւարտին, գերապայծառ՝ հայր Գաբրիէլ թ.ծ.վրդ. Մուրատեան իր սրտին խօսքը փոխանցեց ներկաներուն: Մեծաւոր հայրը յորդորեց ըսելով. «Վարդանանց երախտաւորները կը հաւատային թէ հայը հիմնուելով Քրիստոսի հաւատքին վրայ եւ յանուն այդ հաւատքի ամրապնդման՝մարտիրոսացան, որով մեր ժողովուրդը վերընձիւղուեցաւ եւ այսօր կը յիշատակենք անոնց սխրագործութիւնը: Ուրեմն եկէ՛ք Վարդանանց ոգիով տոգորուած շարունակենք մեր երթը՝ ի կատարումն աշխարհի»: Այնուհետեւ, ան պահպանիչով փակեց երեկոն:

Դիւան՝ 
Հայ կաթողիկէ Սուրբ Փրկիչ եկեղեցւոյ

 
 
Ամենապատիւ Հոգեւոր Տէրը ընդունեց Քանատայի դեսպանը

Ամենապատիւ Հոգեւոր Տէրը ընդունեց Հայոց ցեղասպանութեան 100 ամեակի մարմինը

Պաշտօնական բացումը Ծէսին նուիրուած Տարուան

Հանդիսաւոր փակում հաւատքի տարուան եւ հռչակում ծիսական տարուան

Աշակերտական հաւաք Հայ Կաթողիկէ Պատրիարքարանի Նահատակաց Յուշակոթողին շուրջ

Տօն Սրբոյ Կուսին Աւետման Եկեղեցւոյ Անուանակոչութեան

Գրիգոր Պետրոս Ի. Կաթողիկոս Պատրիարքին Դատապարտագիրը

Հայաստանի Հանրապետութեան Նորանշանակ Դեսպանը այցելեց Հայ Կաթողիկէ Պատրիարքարան

 
Armenian Catholic Synod 2013
Ամենապատիւ Հոգեւոր Տիրոջ Հովուապետական առաջին այցելութիւնը Սուրբ Խաչ  եկեղեցւոյ ժողովրդապետութիւն
Show All Photo Galleries
 

© 2018

       
News Photo Gallery    
Downloadable Books Newsletter    
Downloadable Publishings Blog    
Recomended Links FAQ    
Eparchies Contact Us    
Videos About Us